पथटाईम्स

माधव नेपालज्यू, माला लाएपछि हेलमेट चाहिँदैन ?

पूर्वप्रधानमन्त्रीको चुनाव प्रचारमा ट्राफिक नियम उल्लंघन

११, कात्तिक 

 तपाईले हेलमेट नलगाई मोटरसाइकल चलाउनुभयो भने के हुन्छ ? यो भनिरहनुपर्दैन कि तपाईलाई ट्राफिकले च्याप्पै समात्छ र पूर्जी काट्छ ।

मुलुकको प्रधानमन्त्री भइसकेको व्यक्तिलाई मोटरसाइकल पछाडि राखेर भोट माग्न हिँड्दा चाहिँ ट्राफिक नियम चाहिँदैन भन्ने कुरो तस्वीरमा देखिएका एमाले नेता माधव नेपाल र उहाँका मोटरसाइकल चालकले स्पष्ट पारेका छन् । त्यसो त भनाइ नै छ, कानून सानाका लागिमात्रै हो, ठूलालाई होइन । माधव नेपालको कार्यक्रममा हिँडेका केहीले हेलमेट लगाएर मोटरसाइकल चलाएका थिए भने केहीले लगाएनन् ।

पूर्वप्रधानमन्त्री तथा काठमाडौं २ का एमाले उम्मेद्वार माधवकुमार नेपाल मतदाता घरदैलो अभियानअन्तर्गत सोमबार काठमाडौंको मूलपानी-५ स्थित दलित वस्तीमा यसैगरी हेलमेट नलगाएका चालकको पछाडि बसेर दौडनुभयो ।

यस क्रममा बिसुंखे टोलमा दलित समूदायलाई सम्बोधन गर्दै वरिष्ठ नेता नेपालले दलितका छोराछोरीलाई निःशुल्क शिक्षा तथा नर्सिङतर्फ निःशुल्क उच्च शिक्षाको व्यवस्था गर्ने निर्णय आफ्नै नेतृत्वको सरकारले गरेको जानकारी दिनुभयो । ट्राफिक नियम मिच्ने नेता नेपालले दलित बस्तीमा पुगेर भन्नुभयो ‘वास्तविक रुपमै दलित समुदायलाई साहारा दिने पार्टी एमाले नै हो ।’

मतदाता घरदैलो कार्यक्रमअन्तर्गत सोमबार नेपालले मूलपानीको वडा नं ५, ६ र ९ का मतदाताहरुसँग भेटघाट गर्नुभएको थियो । त्यसक्रममा उहाँलाई स्थानीय मतदाताका साथै युवा क्लवहरुले आफ्ना समस्या अवगत गराएका थिए ।