पथटाईम्स

अमेरिकी जासुस एडवार्ड स्नोडेनलाई रसियामा राजनैतिक शरण , अमेरिका निराश

अमेरिकी जासुस एडवार्ड स्नोडेनलाई रसियाले राजनैतिक शरण दिएकोमा अमेरिका निराश भएको छ । अमेरिकि राष्ट्रपति कार्यालयका प्रवक्ता जे कार्नीले यो घटनाले आगामि महिना दुइ देश बिच हुन लागेको शिखर सम्मेलनलाई प्रभावित हुन सक्ने बताउनु भएको छ । आगामि महिना अमेरिकि राष्ट्रपति बराक ओवामा र रसियाका राष्ट्रपति भ्यादिमिर पुटिन जी २० को बैठकमा भेटने कार्यक्रम थियो । यता एडवार्ड स्नोडेनले आफुलाई राजनैतिक शरण दिएकोमा रसिया सरकारलाई धन्यवाद दिएका छन ।
एडवार्ड स्नोडेनले हिजो करीब तीस दिनदेखि आश्रयस्थलका रुपमा प्रयोग गर्दै आएको मस्कोको एयरपोर्ट छाडेका थिए । रुसले राजनीतिक शरणका लागि उनले गरेको आवेदन स्वीकृति गरेपछि उनले एयरपोर्ट छाडेका हुन ।

गत २३ जुनका दिन उनी हङकङबाट मस्कोको शेरेमेटेभो एयरपोर्टमा आइपुगेका थिए । त्यसबेलादेखि नै उनी त्यही एयरपोर्टको ट्रान्जिट क्षेत्रमा बस्दै आएका थिए ।
अमेरिकी गुप्तचर संस्था नेशनल सेक्युरिटी एजेन्सीकालागि काम गर्दै आएका उनी सो एजेन्सीले लाखौ अमेरिकीहरुको टेलिफोन र इन्टरनेट गतिविधिहरु रेकर्ड गरिरहेको सुचना चुहाएपछि चर्चामा आएका हुन । सीआइएकालागि समेत काम गरिसकेका उनीसंग अन्य थुप्रै गुप्तचरी सुचना हुनसक्ने अनुमान गरिएको छ ।