पूर्वडीएसपी जगदीश चन्द पक्राऊ
सञ्चार उद्यमी जमिम साहको हत्यामा संलग्न रहेको आरोप लागेर फरार भएका पूर्वडीएसपी जगदीश चन्दलाई प्रहरीले शनिबार नयाँ बानेश्वरबाट पक्राऊ गरेको छ ।
साहको हत्या भएको ६ वर्षपछि प्रहरीले पूर्वडीएसपी चन्दलाई पक्रन सफल भएको हो । प्रहरी अपराध महाशाखाका प्रमुख एसएसपी सर्वेन्द्रनाथ खनालले महाशाखाको जिम्मेवारी सम्हाले लगत्तै चन्द पक्राउ परेका हुन् ।
पक्राउ परेका पूर्वप्रहरी अधिकारी चन्दलाई आइतबार पत्रकार सम्मेलनमार्फत सार्वजनिक गरिने अपराध महाशाखाले जनाएको छ ।
चन्दविरुद्ध रेड कर्नर नोटिससमेत जारी भएको थियो । उनलाई वर्षौंसम्म गिरफ्तार पर्न नसक्दा प्रहरीको क्षमता र नियममाथि प्रश्न उठाउने गरिएको थियो । तर, एसएसपी खनालको नेतृत्वमा पुरानो अपराधको घटनामा महत्वपूर्ण सफलता हात परेको छ ।
जमिम शाह
जमिम साह
स्पेसटाइम नेटवर्क प्रालिका अध्यक्ष ४७ वर्षीय जमिमको ०६६ साल माघ २४ गते काठमाडौंको लाजिम्पाटस्थित फ्रान्सेली दूतावास अगाडिको मुख्य सडकमा गोली हानी हत्या भएको थियो । दिउँसो २ः२० बजे मोटरसाइकलमा आएका दुई व्यक्तिले सञ्चार उद्यमी साहको हत्या गरेर फरार भएका थिए ।
याक एण्ड यतिको हेल्थ क्बलबाट पजेरो चढेर घर फर्किइरहेका साहलाई भारतीय हत्याराले होटलदेखि नै पिछा गरेर हत्या गरेका थिए ।
तत्कालीन डीएसपी चन्दले अपराधीहरुलाई भगाउन सहयोग गरेको उनीमाथि अभियोग छ ।
घटनापछि फरार चन्द भारतमा लुकेको अनुमान गरिँदै आएकोमा ६ वर्षपछि चन्द नयाँ बानेश्वरबाटै समातिएका हुन् ।
Post a Comment