पथटाईम्स

अशक्त शिक्षकको चार लाख रुपैया प्रधानाध्यापकले अनियमितता गरेको खुलासा

जेठ २६,

पाँचथरको लिम्बा–९ गाविसको एक विद्यालयका प्रधानाध्यापकले एक अशक्त शिक्षकको सञ्चय कोषमा जम्मा हुने  रकम हिनामिना गरेको  खुलासा भएको छ । लिम्बा पञ्चेश्वरी प्राथमिक विद्यालयका प्रधानाध्यापक सुर्यमान ग्यावाले त्यही विद्यालयमा कार्यरत अशक्त शिक्षक बिद्यानन्द यादवको  सञ्चय कोषको  चार लाख रुपैयाँ हिनामिना गरेका हुन् ।

 

प्रधानाध्यापक ग्यावाले २०६७ सालदेखि हालसम्म आफ्नो सञ्चयकोषमा जम्मा हुनुपर्ने चार लाख रुपैयाँ हिनामिना गरेको भन्दै पीडित यादवले जिल्ला शिक्षा कार्यालय पाँचथरमा निवेदन दिनुभएको छ ।  सञ्चय कोषमा जम्मा भएको रकम निकासा माग्न विराटनगरस्थित सञ्चयकोषको कार्यालयमा जाँदा त्यहाँ केही रेकर्ड नभेटिएपछि खोजी गर्ने क्रममा प्रधानाध्यापकले नै पैसा जम्मा नगरेको खुलेको पीडितको दाबी छ ।

 

यसबारे प्रधानाध्यापकसँग बुझ्दा आलटाल गर्दै तीन महिना बिताएपछि जिल्ला शिक्षा कार्यालयमा गएको चैतमा निवेदन दिएको यादवले बताउनुभयो । तर अहिलेसम्म कुनै कारबाही नभएको उहाँको गुनासो छ ।

 

पटकरपटक धाइरहेको भएता पनि शिक्षा कार्यालयका विद्यालय निरिक्षक सालिग्राम काफ्लेका अनुसार वैशाखभित्र ग्यावाबाट साँवा ब्याज भराइदिने भनेपनि अहिलेसम्म आफूले एक रुपैयाँ पनि नपाएको उहाँले बताउनुभयो । जिल्ला शिक्षा अधिकारी राजकुमार विकले रकम दिलाई दिन दुई पटक पत्राचार गरेपनि प्रधानाध्यापकले बेवास्ता गरेकाले विभागीय कारबाही गर्ने तयारी भएको बताउनुभयो । पीडित शिक्षकको बाँया हातको हत्केला र औंला छैनन् ।