पथटाईम्स

 मिसनमा गएका नेपाली सैनिकको मृत्यु

 

२ जेठ

 अफ्रिकी मुलुक कङ्गोमा खटिएका नेपाली शान्ति सेनाका सिपाही बलबहादुर नेपालीले वीरगति प्राप्त गर्नुभएको छ ।

कर्तव्य पालनाका सिलसिलामा गत वैशाख २८ गते उहाँको निधन भएको हो । विगत आठ महिनादेखि उहाँ भीमदल गण शान्ति सेनाको २१औँ डफ्फाअन्तर्गत कङ्गोमा सेवारत हुनुहुन्थ्यो ।

वीरगति प्राप्त गर्नुभएका सिपाही नेपालीको शव आज स्वदेश ल्याइएको र आजै गौचरस्थित कालीप्रसाद गणको प्राङ्गणमा सैनिक सम्मानका साथ श्रद्धाञ्जलि अर्पण गरिएको नेपाली सेनाले जनाएको छ ।

सेनाले विश्व शान्ति, भ्रातृत्व र मानवमात्रको लागि कर्तव्यमा रहँदा वीरगति प्राप्त गर्नु आफैँमा एक विशिष्ट त्याग र बलिदान भएको जनाउँदै शान्ति स्थापनाको पुण्य कार्यमा समर्पित सैनिक जवानको बलिदानले सबै नेपाली र नेपालको विश्व शान्तिप्रतिको अटुट समर्पणलाई उजागर गरेको नेपाली सेनाले आज जारी गरेको विज्ञप्तिमा उल्लेख छ ।

हालसम्म शान्ति स्थापनार्थ विश्वका विभिन्न मुलुकमा तैनाथ ६० जना शान्ति सैनिकले वीरगति प्राप्त गरिसकेका छन् ।